2024-06-10 19:19:21
შალვა პაპუაშვილი თბილისის საჯარო მენეჯმენტის სკოლის წარმომადგენლებს შეხვდა

პარლამენტის თავმჯდომარე შალვა პაპუაშვილი თბილისის საჯარო მენეჯმენტის სკოლის პირველი ნაკადის წარმომადგენლებს შეხვდა, რომლებიც სხვადასხვა სახელმწიფო უწყებებში საქმიანობენ.

პარლამენტის პრესსამსახურის ინფორმაციით, შალვა პაპუაშვილი თბილისის საჯარო მენეჯმენტის სკოლის მხარდამჭერია და შესაბამისად, სკოლის პირველი ნაკადის შეხვედრების სერია შალვა პაპუაშვილთან შეხვედრით გაიხსნა. დისკუსიის თემა იყო „რეფორმები, ბიზნესი და პარლამენტი“.

„როდესაც ჩვენ ვსაუბრობთ საჯარო სექტორზე, საჯარო მმართველობაზე, მნიშვნელოვანია იყოს კომუნიკაცია არა მხოლოდ ფორმალურ დონეზე – სისტემებით და წერილებით, არამედ ურთიერთობის ქსელით, რომელიც ყოველთვის ყველა სისტემაში აადვილებს ინფორმაციის გაცვლას, თანამშრომლობას და თანამშრომლობაზე დაფუძნებული გადაწყვეტილებების მიღებას. ამიტომ, ასეთი სახის პროექტები, რომელიც ამ ქსელს აძლიერებს, ერთმანეთთან კომუნიკაციას უადვილებს და ფორმალურის მიღმა არაფორმალურ კომუნიკაციასაც  ამყარებს, მხოლოდ მისასალმებელია და მიხარია, რომ შესაძლებლობა მაქვს ამ პროექტის მიმართ მხარდაჭერა გამოვხატო“, – განაცხადა პარლამენტის თავმჯდომარემ.

ეროვნულ მიზნებზე და ამოცანებზე საუბრისას, შალვა პაპუაშვილმა აღნიშნა, რომ ჩვენს ქვეყანას, რომელიც ჯერ კიდევ  ტრანსფორმაციის პერიოდს გადის, ეკონომიკურად გარკვეული დონის მიღწევა სჭირდება.

„ერთ-ერთი მნიშვნელოვანი ამოცანაა ჩვენი მოსახლეობის კეთილდღეობა და ამისკენაამიმართული ეკონომიკური პოლიტიკის განმსაზღვრელი ის გადაწყვეტილებები, რომელსაც პარლამენტი მთავრობასთან ერთად იღებს. თუ შევხედავთ, ვნახავთ, რომ ბოლო პერიოდში, ეკონომიკური ზრდის მიხედვით,  ლიდერი ვართ არამარტო რეგიონში, არამედ ევროკავშირთან შედარებითაც“, – განაცხადა  პარლამენტის თავმჯდომარემ.

შალვა პაპუაშვილმა ყურადღება გაამახვილა ევროკავშირში ინტეგრაციის პროცესზე და კანონმდებლობის ჰარმონიზაციის თანმხლებ გამოწვევებზე.

როგორც მან აღნიშნა, ასოცირების შეთანხმების 55 პროცენტი  უკვე შესრულებულია და ამ კუთხით საქართველო სხვა ქვეყნებთან შედარებით წინ არის.

„პარლამენტი ერთ-ერთი მთავარი ინსტიტუციაა, რომელიც ამ რეგულაციების შესრულებაზე ზრუნავს საკანონმდებლო დონეზე, თუმცა შემდეგ უკვე სამინისტროები, კანონქვემდებარე აქტების დონეზე, მიჰყვებიან ამ პროცესს იმისთვის, რომ ყველა ეს რეგულაცია დაინერგოს“, – განაცხადა შალვა პაპუაშვილმა.

პარლამენტის თავმჯდომარის თბილისის საჯარო მმართველობის სკოლის წარმომადგენლებთან  შეხვედრა დისკუსიის ფორმატში წარიმართა, რომელსაც  მოდერაციას  Business Insider Georgia-ს და Economic Forum-ის დამფუძნებელი გიორგი აბაშიშვილი უწევდა.

სასწავლი კურსის მიზანია საჯარო მოხელეთა პროფესიული განვითარების ხელშეწყობა და საჯარო და კერძო სექტორებს შორის კომუნიკაციის გაუმჯობესება ცოდნისა და გამოცდილების გაზიარებით. კურსი მოიცავს ექვს თემას და თითოეული თემის განხილვაში მონაწილეობას მიიღებენ სახელმწიფოს მაღალი რანგის თანამდებობის პირები და კერძო სექტორის წამყვანი კომპანიების ბიზნეს ლიდერები.

ინფორმაციას პარლამენტის პრესსამსახური ავრცელებს.

ამავე თემაზე