ჩვენი პარტნიორები ჩვენთან ერთად მოქმედებენ, როგორც ტექნიკური თვალსაზრისით, ასევე სერიოზული დაცვითი მექანიზმების შექმნის მიზნით, ვფიქრობ, ჩვენი პოლიტიკური ოჯახი სწორად გვაქვს შერჩეული, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.
„არაერთხელ მითქვამს მეც და ჩემს კოლეგებსაც, რომ მსოფლიო დონეზე საკმაოდ მწვავე და ინტენსიურია დაპირისპირება, საქართველო არის ერთ-ერთი მნიშვნელოვანი სეგმენტი ამ დაპირისპირებისა. სამწუხარო ფაქტი ის არის, რომ საქართველოს თავისი საგამოძიებო მოქმედებები, თავისი რესურსი არ ჰყოფნის მთლიანად, რომ გასცეს საკადრისი პასუხი ასეთ საზარელ შემოტევას და მადლობა ღმერთს, ჩვენი პარტნიორები ჩვენთან ერთად მოქმედებენ, როგორც ტექნიკური თვალსაზრისით, ასევე სერიოზული დაცვითი მექანიზმების შექმნის მიზნით. მე ვფიქრობ, რომ ეს გაერთიანება, ჩვენი პოლიტიკური ოჯახი სწორად გვაქვს შერჩეული, სწორი გზა არის საერთაშორისო დონეზე. ჩვენი პოლიტიკა არის აბსოლუტურად ორიენტირებული ხვალინდელ დღეზე, ხვალინდელ უსაფრთხოებაზე“, – განაცხადა პირველმა ვიცე-სპიკერმა.
