2022-07-01 10:00:48
ვემიჯნებით საუნივერსიტეტო სივრცეში პოლიტიკური პროცესების შემოტანას - თსუ-ს განცხადება

თბილისის სახელმწიფო უნივერსიტეტი გუშინ "მაღლივ" კორპუსში სუტდენტებზე მომხდარ თავდასხმას ეხმაურება და აცხადებს, რომ მხარს უჭერენ აზრის გამოხატვის მხოლოდ დემოკრატიულ ფორმებს და ემიჯნებიან საუნივერსიტეტო სივრცეში პოლიტიკური პროცესების შემოტანას.

,,ივანე ჯავახიშვილის სახელობის თბილისის სახელმწიფო უნივერსიტეტი ეხმაურება თსუ ბიბლიოთეკის მიმდებარე ტერიტორიაზე ახალგაზრდების ჯგუფებს შორის მომხდარ ინცინდენტს, რომლის განმუხტვაც თსუ დაცვის და უსაფრთხოების სამსახურის თანამშრომლებმა შეძლებისდაგვარად მოახერხეს.

თსუ-ის სტუდენტები, პროფესორ-მასწავლებლები თუ ადმინისტრაციის თანამშრომლები შეუზღუდავად სარგებლობენ საქართველოს კონსტიტუციით მინიჭებული უფლებებითა და თავისუფლებებით. საუკუნეზე მეტია უნივერსიტეტი ემსახურება საზოგადოების განათლებას, ქვეყანაში დემოკრატიული პრინციპების დამყარებასა და განმტკიცებას.

შესაბამისად, უნივერსიტეტი მხარს უჭერს აზრის გამოხატვის მხოლოდ დემოკრატიულ ფორმებს და ამავე დროს, ემიჯნება საუნივერსიტეტო სივრცეში პოლიტიკური პროცესების შემოტანას.  ადმინისტრაცია  არ დაუშვებს  საუნივერსიტეტო სივრცეში პოლიტიკური დაპირისპირების მცდელობას და მიმართავს ყველა პოლიტიკურ ძალას თავი შეიკავოს მსგავსი ქმედებებისგან.

უნივერსიტეტი კიდევ ერთხელ ხაზგასმით აცხადებს, რომ მიუღებელია ნებისმიერი სახის ძალადობა და მოუწოდებს ახალგაზრდებს მეტი პასუხისმგებლობით მოეკიდონ  ადამიანის უფლებებს, პატივი სცენ გამოხატვის თავისუფლებას და თავი შეიკავონ მაპროვოცირებელი ქმედებებისგან", - წერია განცხადებაში.  

ცნობისთვის, თსუ-ს მაღლივ კორპუსში სტუდენტებს, რომლებიც 3 ივლისის აქციის ფლერებს არიგებდნენ აგრესულად განწყობილი პირები სიტყვიერად და ფიზიკურად დაუპირისპირდნენ.    

ამავე თემაზე