2021-03-03 12:19:16
ოპოზიცია პროტესტის ფორმას ცვლის

ოპოზიცია პროტესტის ფორმას ცვლის. მას შემდეგ, რაც ხელისუფლებამ მოწინააღმდეგეები მწვავედ გააკრიტიკა, რომ დიალოგის პარალელურად დაუშვებელია დესტრუქცია, პარტიების დიდი ნაწილი სახელმწიფო უწყებების პიკეტირებაზე უარს ამბობს.

გაგრძელდება აქციები, რომელიც, ორგანიზატორების თქმით, მშვიდობიანი იქნება. ამით ქუჩაში მყოფი ოპოზიცია იზღვევს თავს, რომ მოლაპარაკებების პროცესი ხელისუფლებამ არ ჩაშალოს.

ძალაში რჩება 13 მარტის საპროტესტო აქცია. სხვა გეგმებზე ჩამოსაყალიბებლად დღეს გაერთიანებულ ოპოზიციას არა ლეიბორისტების, არამედ "ნაციონალური მოძრაობის" ოფისში უმასპინძლებენ. ხელისუფლებას აქვს 10 დღიანი ვადა, რათა დაინახოს გზა, სად ხედავს ქვეყნის კრიზისიდან გამოყვანის შესაძლებლობას.

"იმისთვის, რომ თავიდან ავიცილოთ რაიმე პროვოკაცია, მივიღეთ ასეთი ზომა, რომ რაც შეიძლება ნაკლებ კონტაქტში შევიდეთ პოლიციასთან და ხელისუფლებასთან, ისეთი აქციები დავგეგმოთ. თუ ადრე ვფიქრობდით პიკეტირებაზე და მისი აზრი იყო ყურადღების მიქცევა, ხმის გაგონება ხელისუფლებისთვის, გადავალთ მანიფესტაციაზე ტრანსპარანტებით, ქუჩაში ავტომობილებით მოძრაობაზე, საყვირის ხმის გაგონებაზე ხელისუფლებისთვის და ა.შ,"- აცხადებს "სტრატეგია აღმაშენებლის" წევრი პაატა მანჯგალაძე „რუსთავი 2“-ის ეთერში. 

ამავე თემაზე