პრემიერ-მინისტრ გიორგი გახარიას პარლამენტში ინტერპელაციის წესით დღეს მოუსმენენ. საკანონმდებლო ორგანოში გიორგი გახარია ოპოზიციამ დაიბარა. დეპუტატების კითხვები მთავრობისთვის უკვე გადაგზავნილია.
„ნაციონალური მოძრაობის“ წევრის, სალომე სამადაშვილის განცხადებით, გიორგი გახარიასთვის გაგზავნილი შეკითხვების შინაარსი ძირითადად ქვეყნის ეკონომიკასა და ანტიკრიზისულ გეგმას ეხება.
„გახარიასთან გვექნება კითხვები იმაზე, რაც არის დღეს მთავარი გამოწვევა, საქართველოს აქვს რეგიონში ერთ-ერთი ყველაზე უარესი მაჩვენებელი შიმშილის ინდექსში, ყველაზე მოწყვლადი ჯგუფები რჩებიან ფაქტობრივად ყველანაირი დახმარების გარეშე ინფლაციის ფონზე. ასევე გვაქვს შეკითხვა სიღარიბესთან დაკავშირებით. საზოგადოებას ექნება შესაძლებლობა, კიდევ ერთხელ ნახოს, რომ დღეს ქვეყანას მართავს ხელისუფლება, რომელმაც ბედის ანაბარა მიატოვა საკუთარი ხალხი“, – განაცხადა სალომე სამადაშვილმა.
მიმდინარე კვირაში პრემიერ-მინისტრი პარლამენტში უკვე იყო მისული. 27 მაისს გიორგი გახარიამ დეპუტატებს „კოვიდ-19“-ის პანდემიის წინააღმდეგ მთავრობის მიერ გაწეული ორთვიანი საქმიანობის შესახებ ანგარიში საკუთარ ინიციატივით წარუდგინა. როგორც ცნობილია, მთავრობის მეთაური პარლამენტს ივნისის დასაწყისშიც ესტუმრება და მთავრობის ყოველწლიურ ანგარიშს წარადგენს.
