2020-01-24 10:18:45
ელჩთან ვისაუბრეთ საარჩევნო სისტემაზე და ბოლოდროინდელ რამდენიმე კრიტიკულ განცხადებაზე - მდინარაძე 

ელჩთან ვისაუბრეთ საარჩევნო სისტემაზე და ბოლოდროინდელ რამდენიმე კრიტიკულ განცხადებაზე - ამის შესახებ სოციალურ ქსელში, საპარლამენტო უმრავლესობის ლიდერი მამუკა მდინარაძე წერს. მისი თქმით, გერმანიის ფედერაციული რესპუბლიკის ელჩთან ჰუბერტ ქნირშთან ძალიან კარგი შეხვედრა ჰქონდა და შეხვედრაზე ბოლო დროს საქართველოს მთავრობის მისამართით გავრცელებულ კრიტიკულ წერილებზე ისაუბრა.

"ძალიან კარგი შეხვედრა მქონდა გერმანიის ფედერაციული რესპუბლიკის ელჩთან. ჰუბერტ ქნირში ჩვენი ქვეყნის ერთ-ერთი საუკეთესო მეგობარი, გამორჩეული დიპლომატია. მიმდინარე თემებზე, პარლამენტის გეგმებზე, საარჩევნო სისტემაზე და ბოლოდროინდელ რამდენიმე კრიტიკულ განცხადებაზეც ვისაუბრეთ, რისი საფუძველიც არასწორი ინფორმაცია გახდა. სტუმარს ერთ-ერთი ასეთი მაგალითიც გავაცანი, როდესაც კონკრეტულმა სააგენტომ გაავრცელა ინფორმაცია, თითქოს, ბიძინა ივანიშვილმა თქვა, რომ ოპოზიციის ბევრი ლიდერი დროს ციხეში გაატარებს მომავალში და ამ ინფორმაციაზე დაყრდნობით ერთ-ერთმა პარლამენტარმა ევროპის მაღალი ტრიბუნიდან განცხადება გააკეთა. როდესაც თავად ამბავი არის მოგონილი, ბუნებრივია, შეფასებაც არ იქნება რელევანტური და სწორი.

ვისაუბრეთ იმაზეც, რომ გარკვეული კომუნიკაციური პრობლემები იყო, ვინაიდან პარტიული საგარეო მიმართულების ხელმძღვანელები დღეს ჩვენი გუნდის წევრები არ არიან, მაგრამ ეს პრობლემა მალე აღმოიფხვრება. შესაბამისად, ჩვენ გვაქვს პოზიტიური მოლოდინი, რომ არასწორ ინფორმაციაზე დაყრდნობით ევროპის მაღალი ტრიბუნიდან არ მივიღებთ არასწორ კრიტიკას. ზოგადად, კრიტიკას იმსახურებს ყველა ხელისუფლება, ყველას აქვს გარკვეული ხარვეზები, გარკვეული შეცდომები, მაგრამ ობიექტური კრიტიკა არის გაცილებით მისაღები, ვიდრე „ფეიკ ნიუსებზე“ დაყრდნობით გამოწვეული კრიტიკა.

მთავარია, რომ ზოგიერთ ჩვენს კოლეგასთან ეს დროებითი გაურკვევლობა ვინმემ დასავლური განწყობების საწინააღმდეგოდ არ გამოიყენოს. ეს არის ჩვენი და ჩვენი დასავლელი პარტნიორების ერთ-ერთი საერთო მიზანი." - წერს მდინარაძე სოციალურ ქსელში.

ამავე თემაზე