2019-09-30 16:28:43
ბიუჯეტში 26 მილიონი გვქონდა გათვალისწინებული და 100 მილიონამდე გავზარდეთ - ღარიბაშვილი

ბიუჯეტში 26 მილიონი გვქონდა გათვალისწინებული და 100 მილიონამდე გავზარდეთ - ამის შესახებ განცხადება, თავდაცვის მინისტრმა ირაკლი ღარიბაშვილმა საქართველოს მთავრობის რიგგარეშე სხდომაზე 2020 წლის ბიუჯეტის პროექტის განიხილვისას გააკეთა.

„პირველი მიმართულება იქნება ინფრასტრუქტურის განვითარება. ჩვენ ბიუჯეტში 26 მილიონი გვქონდა გათვალისწინებული და 100 მილიონამდე გავზარდეთ. ჩემი მთავარი ამოცანა იქნება, რომ 2020 წელს მაქსიმალურად გავშალოთ ფრონტი და თითქმის ყველა ბაზაზე დავიწყოთ განახლება სამხედრო ბაზების, ყაზარმების, სველი წერტილების, სასადილოების თუ სხვა. მეორე მიმართულება იქნება ჯარისკაცების ეკიპირების გაუმჯობესება – ჩაცმულობა, ფეხსაცმელები და სხვა. კვება გახდება კიდევ უფრო უკეთესი, ვიდრე არის დღეს. გაგრძელდება ჩვენი სამხედროების ფიზიკური მომზადება, მინდა, ასევე აღვნიშნო ამერიკული მხარის დახმარება ამ მიმართულებით. ასევე მინდა ვთქვა, რომ ხელფასების ზრდა გვაქვს გათვალისწინებული და მომავალ წელს ხელფასები 20 მილიონი ლარით იზრდება, წოდებისა და რანგის მიხედვით 100-500 ლარამდე იზრდება.

მინდა აქცენტი გავაკეთო თავდაცვისუნარიანობის გაძლიერებაზე. ამაში მე ვგულისხმობ შეიარაღების, ასევე თავდაცვის სისტემების ნაწილს. ერთ-ერთი მთავარი პრიორიტეტი იქნება სამხედრო მრეწველობის მიმართულება, ასევე, ადგილობრივი წარმოების დაწყება. ასევე, წარმოგიდგენთ მნიშვნელოვანი იდეას, რეფორმების და განათლების მიმართულებით. ჩვენ ზრდა გვექნება განათლების კომპონენტში და კიბერუსაფრთხოებაში“, – განაცხადა ირაკლი ღარიბაშვილმა.

საქართველოს თავდაცვის მინისტრმა მთავრობის სხდომაზე ახალი იდეა გააჟღერა. „გვინდა დავამუშავოთ იდეა, რომელიც ითვალისწინებს ერთგვარ ფრონტ-ოფისის გახსნას ყველა რაიონში. ეს საწყისი იდეაა და ამაზე გვექნება კონსულტაციები მთავრობის ფორმატში, რომელი ცითვალისწინებს წვევამდელების რეფორმას. წვევამდელებზე ზრუნვა იქნება ერთ-ერთი მთავარი პრიორიტეტი. ჩვენი ბიუჯეტი განისაზღვრა 880 მილიონი ლარით, აქედან 25 მილიონი ლარი დამატებით იქნება დაფინანსებული საბიუჯეტო სახსრებიდან. გასულ წელს იყო 820 მილიონი, 2020-ში იქნება 845 მილიონი“, – განაცხადა ირაკლი ღარიბაშვილმა.

ამავე თემაზე