2019-09-19 17:02:14
„პორნოგრაფიის საქმეზე“ დაკავებული ავსტრალიის მოქალაქე ბრალს არ ეთანხმება

არასრულწლოვნების მონაწილეობით პორნოგრაფიული პროდუქციის დამზადება და გასაღების საქმეზე დაკავებული ავსტრალიის მოქალაქის ადვოკატის, ნინო ტაბატაძის განცხადებით, დაკავებული დუმილის უფლებას იყენებს და წარდგენილ ბრალს არ ეთანხმება.

საზოგადოებრივი დამცველი ამბობს, რომ ბრალდებულმა საქმის დეტალების შესახებ საუბარი აუკრძალა. ნინო ტაბატაძის განცხადებით დამატებითი კომენტარის გაკეთებას მაშინ შეძლებს, როდესაც ბრალის შესახებ ოფიციალურ დოკუმენტებს გაეცნობა და მისი დაცვის ქვეშ მყოფთან დამატებით შეათანხმებს პოზიციას.

ადვოკატის ინფორმაციით პროკურატურის მხრიდან პატიმრობის მოთხოვნის შემთხვევაში, ის გირაოს ან აღკვეთის ღონისძიების გარეშე დატოვებას მოითხოვს.

საქართველოში დააკავეს 11 ადამიანი, რომლებსაც ბრალად ედება არასრულწლოვნების მონაწილეობით პორნოგრაფიული პროდუქციის დამზადება და გასაღება. შინაგან საქმეთა სამინისტროს ინფორმაციით, დაკავებულთა შორის არიან არასრულწლოვანთა მშობლები და აშშ-ის და ავსტრალიის მოქალაქეები.

დაკავებულთა შორის არიან პორნოგრაფიული ნაწარმოების დამზადებაში ჩაბმული არასრულწლოვანი ბავშვების მშობლები, მათი ნათესავები და ახლობლები და უკანონო ფოტოსალონის მფლობელები და თანამშრომლები.

ამავე თემაზე