ვენესუელის პრეზიდენტ ნიკოლას მადუროს თქმით, კარაკასი ვაშინგტონთან დიპლომატიურ ურთიერთობებს წყვეტს. ეს განცხადება მადურომ მას შემდეგ გააკეთა, რაც დონალდ ტრამპმა ვენესუელის გარდამავალ პრეზიდენტად ოპოზიციის ლიდერი, ხუან გუაიდო აღიარა.
ნიკოლას მადურომ აშშ-ს სახელმწიფო გადატრიალების მცდელობაში დასდო ბრალი და ამერიკელ დიპლომატებს ქვეყნის დასატოვებლად 72 საათი მისცა.
„ჩვენ საკმარისი ინტერვენციონიზმი ვიხილეთ! აქ ჩვენ ღირსება გვაქვს!“, – განაცხადა ვენესუელის ლიდერმა, რომლის მეორე ვადით არჩევას აშშ-ი, ევროკავშირი და ლათინური ამერიკის სახელმწიფოების ნაწილი „არალეგიტიმურს“ უწოდებს.
მიუხედავად მადუროს მოთხოვნისა, აშშ-მა ვენესუელიდან დიპლომატების გაწვევაზე უარი თქვა. როგორც აშშ-ის სახელმწიფო მდივანმა მაიკ პომპეომ თქვა, მადუროს აშშ-თან დიპლომატიური ურთიერთობების გაწყვეტის უფლებამოსილება არ აქვს.
შეგახსენებთ, რომ 23 იანვარს, კარაკასში გამართულ მრავალრიცხოვან მიტინგზე ხუან გუაიდომ საკუთარი თავის ვენესუელის დროებით პრეზიდენტად გამოაცხადა.