2018-12-06 16:07:25
ნიკა რურუა დაკრძალეს

ნიკა რურუა ვერის სასაფლაოზე დაკრძალეს.

შეგახსენებთ, რომ კულტურის ყოფილი მინისტრი, პარლამენტის ორი მოწვევის დეპუტატი და "ერთიანი ნაციონალური მოძრაობის" წევრი 4 დეკემბერს საკუთარ სახლში, სავარაუდოდ გულის შეტევით გარდაიცვალა.

ნიკა რურუა 2001 წლიდან აქტიურად თანამშრომლობდა ზურაბ ჟვანიასა და მიხეილ სააკაშვილთან. 2003 წლის „ვარდების რევოლუციის” შემდეგ გახდა საქართველოს მეექვსე მოწვევის პარლამენტის წევრი „ერთიანი ნაციონალური მოძრაობის” საარჩევნო სიიდან. პარლამენტის წევრობისას იყო თავდაცვისა და უშიშროების კომიტეტის თავმჯდომარის პირველი მოადგილე და იურიდიულ საკითხთა კომიტეტის წევრი, ასევე ნატოს საპარლამენტო ასამბლეაში საქართველოს პარლამენტის დელეგაციის თავმჯდომარე.

ნიკა რურუა იყო საქართველოს საბჭოთა ოკუპაციის მუზეუმის დაარსების იდეის ავტორი, რომელიც 2006 წელს გაიხსნა. 

2009 წლის 9 დეკემბერს ნიკოლოზ რურუა დაინიშნა საქართველოს კულტურის, ძეგლთა დაცვისა და სპორტის მინისტრად. ეს თანამდებობა მას 2012 წლის 25 ოქტომბრამდე ეკავა. 

ნიკა რურუა ვერის სასაფლაოს ეკლესიიდან გამოასვენეს, სადაც დილიდან უამრავი ადამიანი შეიკრიბა. ცნობილი სახეები, პოლიტიკოსები და მეგობრები. ადგილზე იმყოფებოდა საქართველოს პრეზიდენტი გიორგი მარგველაშვილიც. 

 

ამავე თემაზე