საქართველოს სავაჭრო-სამრეწველო პალატის ორგანიზებით, იუსტიციის უმაღლესი საბჭოს მოსამართლე წევრები ბიზნეს-სექტორთან შეხვედრებს იწყებენ. პირველი ასეთი ღონისძიება დღეს, პალატის საბჭოს ფორმატში გაიმართა. საქართველოს სავაჭრო-სამრეწველო პალატის საბჭოში ამ ეტაპზე გაერთიანებულია საქართველოს ყველაზე მსხვილი 38 აქტიური ბიზნეს-ასოციაცია, მათ შორის სექტორული ბიზნეს-გაერთიანებებიც.
შეხვედრა საქართველოს სავაჭრო-სამრეწველო პალატის პრეზიდენტმა ნინო ჩიქოვანმა და იუსტიციის უმაღლესი საბჭოს მდივანმა გიორგი მიქაუტაძემ გახსნეს. ღონისძიების პირველ ნაწილში გაიმართა პრეზენტაცია „სასამართლო და ბიზნესი“, რომლის ფარგლებშიც იუსტიციის უმაღლესი საბჭომ ბიზნესთან დაკავშირებულ საკითხებზე კერძო სექტორს უწყების საქმიანობის ანგარიში წარუდგინეს. იუსტიციის უმაღლესი საბჭოს 2017 წლის 24 ივლისის გადაწყვეტილებით, თბილისის საქალაქო სასამართლოს სამოქალაქო საქმეთა კოლეგიაში შეიქმნა მოსამართლეთა ახალი ვიწრო სპეციალიზაცია , რომელიც განიხილავს, სანივთო სამართლებრივ დავებს, იურიდიული პირების რეგისტრაცია-მართვასთან დაკავშირებულ დავებს, სამეწარმეო სამართლებრივ დავებს და აღნიშნულიდან გამომდინარე მოთხოვნის უზრუნველყოფის საშუალების გამოყენებასთან დაკავშირებულ დავებს, თუ სარჩელის ფასი აღემატება 500 ათას ლარს. (კომერციული დავები)ერთი წლის შემდეგ კი საბჭოს გადაწყვტილებით, სპეციალიზაციას დაემატა ინტელექტუალურ საკუთრებასთან დაკავშირებული სამართლებრივი დავები. პრეზენტაცისას საუბარი შეეხო საქმეების განხილვის სტატისტიკურ მონაცემებსაც.
ბიზნეს-სექტორს საშუალება ჰქონდა მათთვის აქტუალურ საკითხებზე მოსამართლეებისთვის შეკითხები პირადად დაესვა და პრობლემატიკა წარედგინა. შეხვედრაში მონაწილეობა იუსტიციის უმაღლესი საბჭოს მოსამართლე წევრებმა და სხვადასხვა ინსტანციის მოსამართლეებმა მიიღეს.
საჯარო-კერძო დიალოგის პლატფორმის შექმნა საქართველოს სავაჭრო-სამრეწველო პალატის საქმიანობაში ერთ-ერთი პრიორიტეტია. პალატა სახელმწიფოსა და კერძო სექტორებს შორის ერთგვარი შუამავლის ფუნქციას ასრულებს. იუსტიციის უმაღლესი საბჭოს მდივანმა გიორგი მიქაუტაძემ ერთ-ერთი პირველი საჯარო-კერძო დიალოგის ტიპის შეხვედრა სწორედ საქართველოს სავაჭრო-სამრეწველო პალატის ორგანიზებით გამართა. აღნიშნულ შეხვედრაზე საბჭოს წევრებს პალატის ეკონომიკურ-სამართლებრივი კომიტეტის წევრი საკონსულტაციო კომპანიები შეხვდნენ. მთავარი განსახილველი საკითხი ბიზნეს-დავები იყო.
