2018-10-22 11:41:00
IBSU-ს წინააღმდეგ სასამართლო დავა შეწყდა - შემოსავლების სამსახურმა სარჩელი უკან გაიტანა

სახელმწიფოსა და „შავი ზღვის საერთაშორისო უნივერსიტეტს“ შორის საგადასახადო დავა შეწყდა. შემოსავლების სამსახურმა სარჩელი უკან გაიწვია. ამის შესახებ დღეს,  თბილისის საქალაქო სასამართლოში გამართულ პროცესზე გახდა ცნობილი. 

აღნიშნული გადაწყვეტილება შემოსავლების სამსახურმა მას შემდეგ მიიღო, რაც შავი ზღვის უნივერსიტეტმა 735 000 ლარი გადაიხადა და ამის დამადასტურებელი დოკუმენტაციაც წარმოადგინა. შემოსავლების სამსახურმა წინა პროცესზე ითხოვა ორკვირიანი ვადა, რათა გადაეწყვიტა, გაიწვევდა თუ არა სასამართლოდან სარჩელს.

სარჩელის უკან გატანისა და საგადასახადო დავის შეწყვეტის შემდეგ IBSU-ს ქონებას ყადაღა ავტომატურად მოეხსნა.

„შავი ზღვის საერთაშორისო უნივერსიტეტის“ წინააღმდეგ შემოსავლების სამსახურმა 2017 წლის თებერვალში დაიწყო დავა. შემოსავლების სამსახურის სარჩელის თანახმად, სახელმწიფო IBSU-სა და მის დამფუძნებლებს დაახლოებით 735 000 ლარს ედავებოდა, რომლის ამოღებაც უნდა მომხდარიყო და რის გამოც, სარჩელის აღძვრამდე ერთი დღის ადრე უნივერსიტეტის ქონებას ყადაღა დაედო.

735 000 ლარი, რომელსაც „შავი ზღვის საერთაშორისო უნივერსიტეტს“ შემოსავლების სამსახური ედავებოდა, IBSU-ს ადმინისტრაციამ მიმდინარე წლის 27 აგვისტოს გადაიხადა. ამასთან, მიმდინარე წლის აგვისტოში „შავი ზღვის საერთაშორისო უნივერსიტეტს“ სტუნდენტების ახალი ნაკადის მიღება ავტორიზაციის საბჭომ საგადასახადო ჯარიმის გამო შეუწყვიტა, რომელიც უნივერსიტეტს 2013 წელს დაეკისრა. საგადასახადო ჯარიმის გამო უნივერსიტეტის ქონებას ამ დრომდე ყადაღა ქონდა დადებული.

ამავე თემაზე