2018-10-04 11:44:45
პუტინის ყოფილი ვიცე-პრემიერი ბათუმში „ფიდეს“ პრეზიდენტად აირჩიეს

ჭადრაკის საერთაშორისო ფედერაციას მომდევნო ოთხი წლის განმავლობაში რუსი არკადი დვორკოვიჩი უხელმძღვანელებს. 

ამის შესახებ გუშინ, ბათუმში გამართულ ჭადრაკის საერთაშორისო ფედერაციის 89-ე კონგრესზე გახდა ცნობილი.

„ფიდეს“ ხელმძღვანელი კენჭისყრის შედეგად აირჩიეს – 185  ხმიდან 103 ხმით.

„ფიდეს“ პრეზიდენტობის პოსტზე სამი კანდიდატურა იბრძოდა: გეორგიოს მაკროპულოსი და ნაიჯელ შორტი, თუმცა ამ უკანასკნელმა კენჭისყრის წინ საკუთარი კანდიდატურა მოხსნა.

მაკროპულოსმა არჩევნებამდე განაცხადა, რომ ეს ბრძოლა პოლიტიკური იყო და ერთ-ერთი კანდიდატის მხარდასაჭერად სხვადასხვა ქვეყნის ფედერაციას ხმის მიცემას აიძულებდნენ.

არკადი დვარკოვიჩი 2018 წლის გაზაფხულამდე რუსეთის ვიცე-პრემიერი იყო, 2008 წლის აგვისტოს ომის დროს კი – რუსეთის ყოფილი პრეზიდენტის, დიმიტრი მედვედევის თანაშემწე. 2007 წელს იყო რუსეთის საჭადრაკო ფედერაციის პირველი ვიცე-პრეზიდენტი, ხოლო 2010-2014 წლებში რუსეთის საჭადრაკო ფედერაციის სამეთვალყურეო საბჭოს თავმჯდომარე. მან „ფიდეს“ პრეზიდენტობის არჩევნებში მონაწილეობის შესახებ, წელს, ივნისში განაცხადა.

ამავე თემაზე