2018-07-16 19:52:23
"ორ ქვეყანას შორის მწვავე იდეოლოგიური დაპირისპირების ეპოქა წარსულს ჩაბარდა" - პუტინი

შეხვედრის დასრულების შემდეგ, აშშ-სა და რუსეთის პრეზიდენტებმა ერთობლივი ბრიფინგი გამართეს, სადაც მედიისთვის განცხადებები გაკეთდა. როგორც რუსეთის პრეზიდენტი აცხადებს, აშშ-ის პრეზიდენტთან მოლაპარაკებები გულწრფელ და საქმიან ატმოსფეროში გაიმართა. ვლადიმერ პუტინის თქმით, ამერიკელ კოლეგასთან შეხვედრაზე რუსულ-ამერიკული ურთიერთობები, პერსპექტივები და საერთაშორისო დღის წესრიგის საკვანძო საკითხები განიხილეს.

"ყველასთვის აშკარაა, რომ ორმხრივი ურთიერთობები რთულ პერიოდს განიცდის, თუმცა ამ სირთულეებს, შექმნილ დაძაბულ ატმოსფეროს, ობიექტური მიზეზები არ აქვთ. „ცივი ომი“დიდი ხნის წინ დასრულდა, ორ ქვეყანას შორის მწვავე იდეოლოგიური დაპირისპირების ეპოქა წარსულს ჩაბარდა, მსოფლიოში ვითარება კარდინალურად შეიცვალა. დღეს რუსეთიც და აშშ-იც სრულაიდ განსხვავებული გამოწვევების წინაშე დგანან. ეს არის საერთაშორისო უსაფრთხოების მექანიზმების ბალანსის, სტაბილურობის საშიში რღვევა, რეგიონული კრიზისები, ტერორიზმისა და საერთაშორისო დანაშაულის საფრთხეების გავრცელება, მსოფლიო ეკონომიკაში მზარდი პრობლემები, ეკოლოგიური და სხვა რისკები. ამ ყველაფერთან გამკლავება მხოლოდ ძალისხმევით გაერთიანებით არის შესაძლებელი. ვიმედოვნებ, რომ ამას გავაცნობიერებთ ამერიკელ პარტნიორებთანაც. დღევანდელმა მოლაპარაკებებმა ასახა ჩემი და ტრამპის ერთობლივი სურვილი ორმხრივ ურთიერთობებში ნეგატიური სიტუაციის გამოსწორების, მათი გაჯანსაღების პირველი ნაბიჯების დასახვის, მისაღები დონის ნდობის აღდგენის და საერთო ინტერესის ყველა საკითხში ძველი დონის თანამშრომლობის აღდგენის შესახებ. როგორც უმსხვილეს ბირთვულ სახელმწიფოებს, ჩვენ განსაკუთრებული პასუხისმგებლობა გვეკისრება მსოფლიო უსაფრთხოებაზე”, – განაცხადა პუტინმა.

ამავე თემაზე